Argizaiola omen-sariak

2012 Durangoko Argizaiola Saria: Benito Lertxundi

Aurten Argizaiola saria Benito Lertxundi (Orio, 1942) musikariak jaso du. 60 hamarkadatik hona erreferente izan da euskal musika sorkuntza eta kulturgintzan. Durangoko Azokarekin izan duen lotura estua izan da hasieratik izan ere beronen bigarren ediziotik egon da gurean presente. Lehenik Ez Dok Amairu taldeko kide gisa Mikel Laboa, Xabier Lete, Lurdes Iriondo ala – aurtengo gure kartela egin duen – Nestor Basterretxearekin, izen batzuk bakarrik aipatzearren.

Gerediaga elkarteak 1992.urtean eman zuen lehenengoz argizaiola omen-saria. Pertsona zein erakundeek euskararen eta euskal kulturaren alde egindako lana goraipatzea da sari honen helburua. Batez ere urte zailenetan, trabak traba, lan egin dutenei ematen zaie saria eta horregaitik "gauean argi" egin zutela gogoratzen da. Hain zuzen, izenburu hori hartzen du saria emateko 2001. urtetik prestatzen den ekitaldiak eta Durangoko Euskal Liburu eta Disko Azokako egitarauan leku izaten du. Aurreko urteetan, modu apalagoan azokaren inaugurazio ekitaldian ematen zen saria.